正牌好朋友

Mercury牌子的電腦主板相信無咩人聽過。我家有一塊P4M266a NDMx，是2004年買的。VIA晶片組，Socket 478插座，咩都內建，AGP graphic…etc。電腦時代購買的，如無記錯是四百元貨仔。配隻cheap雞Celeron 2.0GHz(咩cache都無版)。一句講晒，雞過北姑雞。
用了兩三年，慢過頭頂唔順。得水哥施捨一部Pentium 4 1.8GHz，勉勉強強用到尋日。舊機就丟在客廳(真的是用丟的)吸收日月精華。
上文說到水哥部野用到尋日。話說老尾之航空母航終於勝利啟用，點知連隨到我部錢七收皮。一開機就呱呱聲響，卒在藥石無靈之下隆重宣布底版打柴！本來某老尾承諾下學期尾就會送隻航母過我，不過佢兩年前話我入學就送，結果影都無。所以都係自力更生比較靠譜。
正所謂巧婦都難為無米炊，無錢整機的我只有打「老朋友」的主意。水哥部Pentium 4剛好也是Socket 478，又用DDR RAM，博佢一博啦！打開部機，果層千年積塵仲黑過福隆新街d菜館，好在有罐吹鏡頭的壓縮空氣，出騎樓吹吹吹吹，跌出黎無半斤都有四兩。將粒P4連同重型heat sink移植去訓左兩年大覺的Mercury牌底版。居然又起到機！真係吹脹。
呢種朋友實在太好，你唔理佢，佢都仲會理你。感激之情無以為報，只有係driver都未裝晒的情況下上黎打呢篇野，表揚一下我第一件自資電腦零件。